Green Bus
Kerido Señora/Señor,
Risibí un invitashon pa apertura di “The Green Bus, riba 30 di novèmber 19.00 or riba parkeerplaats di MCB na Saliña.
“The Green Bus” ta un proyekto di Amigu di Tera/Antarctica Team pa pone atenshon na “Keintamentu Global” i e kumbre tokante klima na Kopenhagen di 7 te ku 18 di Desèmber 2009.
Kumbre tokante klima, Kopenhagen desèmber 2009
Aki ta disisdí tokante kontenido di e akuerdo ku mester drenta na vigor despues ku Protokòl di Kyoto terminá na 2012. Meta: akordá kua medida kada pais ta tuma pa redusí kousa i efekto di keintamentu global i kambio di klima, manera redukshon di emishon di CO2, stòp deforestashon i yega na interkambio di teknologia.
The Green Bus Curacao, 30 novèmber te 7 desèmber 2009.
Ku e proyekto “The Green Bus”, Amigu di Tera ta uni ku sobrá mundu pa urgi nos lidernan pa koperá i yega na akshonnan konkreto pa evitá un krisis klimatológiko. Apesar di esei kada siudadano mester sa ku kada ken tin un responsabilidat personal pa stòp keintamentu global i ku e por kumisá ku spar energia i awa i hasi uzo di energia di solo, bientu i laman, fuentenan di energia ku nos na Kòrsou tin na abundansia. The Green Bus tin un eksposishon di produktonan pa spar awa i koriente i ta duna informashon kon mas por spar.
The Green Bus ta habrí pa públiko:
Di djaluna 30 di novèmber te djabièrne 4 di desèmber 19.00 - 20.00
Djasabra 5 di desèmber 17.00 - 20.00
Djadumingu 6 di desèmber 10.00 – 12.00.
Un saludo Kordial
Na nomber di Amigu di Tera/Antarctica Team,
Yvette Raveneau